सुख, स्नेह, माया
सांत्वन, प्रेम, छाया
सर्व काही द्याया
तत्पर तू निरंतर
जीवनी तुझे येणे
फिटे जन्माचे पारणे
सौख्याचे अक्षरलेणे
व्यापून हे दिगंतर
मिळता तुझी ही साथ
तेजाळली संसारज्योत
धरीलास प्रेमपाशात
तू थोपूनी कलंदर
लाभे पाशातही मुक्तता
ऐहिकातही मोक्षता
नास्तिक्यातही आर्तता
काय सांगू अता अवांतर
मी ही तुज लभ्य व्हावे
म्हणशील ते ऐकावे
तू सवाल मज टाकावे
मी व्हावे सुखै निरुत्तर...
***
पसा दोन पसा
बाजरीचं पीठ ताटात घेऊन
चिमुटभर मीट टाकून
वाटीभर पाण्यात मळून
थापलेली भाकर
तव्यावर अन् मग चुलीतल्या विस्तवावर
खरपूर भाजून घ्यावी.
या रेसिपीचा व्हिडीयो
बनवताना
गरमागरम भाकरीचा
एक तुकडा तोडून
तोंडात टाकावा.
कोणत्या इनर्जेन्ट्सचा
कोणता फ्लेवर
जीभेच्या कोणत्या भागावर जाणवतोय
हे सांगायला जाल
अन् तोंडावर चवीची एक्सप्रेशन्स द्यायला जाल
तर त्रेधातिरपीट उडेल तुमची.
पीठ, मीठ, पाणी अन् अग्नी मिळून
पोटाची आग विझवणे
हा एकच इरादा असतो या रेसिपीचा.
पोटाची आग विझत असतानाचे एक्स्प्रेशन्स
तुम्ही कुठून आणाल?
इनर्जेन्ट्स, मसाले आणि त्यांचे फ्लेवर्स
या सगळ्या गोष्टी तर लागतात
भरल्यापोटी करायच्या
पदार्थांच्या रेसिपीत...
****
तुम्ही
एखादा क्षण,
एखादा दिवस...
मनसोक्त जगलात
त्याचा अर्थ काय असतो..
.
अर्रर्र..
आपल्याला अर्थाशी
कुठं काय घेणं देणं आहे..!
.
आपला मूळ मुद्दा हा आहे
कि
आपण खरेखुरे
मनसोक्त जगत असतो
तेव्हा तेथे फक्त आपणच
असतो..
.
निव्वळ आपण..
सुखैनैव एकटे...!!
.
आपलं.. आपलं..
असं आपण
ज्या
आईबाप, भाऊ बहिण, मित्र मैत्रिणी, बायका पोरे,
सहकारी शेजारी,
यांना म्हणत असतो..
.
त्यांच्या पैकी
एखाद्याची
एन्ट्री झाली रे झाली की,
आपल्या मनसोक्तपणाला
मनसोक्त घोडा लागतो..!
.
हा घोडा काबूत ठेवला पाहीजे..
.
तरच
अधूनमधून जगता येईल..
.
मनसोक्त...!
****
मनसोक्त
