मी व्हावे सुखै निरुत्तर...

 

सुख, स्नेह, माया

सांत्वन, प्रेम, छाया

सर्व काही द्याया

तत्पर तू निरंतर

 

जीवनी तुझे येणे

फिटे जन्माचे पारणे

सौख्याचे अक्षरलेणे

व्यापून हे दिगंतर

 

मिळता तुझी ही साथ

तेजाळली संसारज्योत

धरीलास प्रेमपाशात

तू थोपूनी कलंदर

 

लाभे पाशातही मुक्तता

ऐहिकातही मोक्षता

नास्तिक्यातही आर्तता

काय सांगू अता अवांतर

 

मी ही तुज लभ्य व्हावे

म्हणशील ते ऐकावे

तू सवाल मज टाकावे

मी व्हावे सुखै निरुत्तर...

***