व्यवहार

जिथे तिथे मी ही असे तोट्याचे व्यवहार केले
तुझ्यापासून दूर झाले नि दोनाचे चार केले....

तू दिलेल्या नकाराचा सूड असा घेतला मी
देणेघेणे नसते तिथे प्रेम अपरंपार केले...

प्राक्तनावर चरफडून मी हात दुसऱ्या हाती दिला
त्यानेही कहर केला, प्रेम मजवर फार केले....

तुझ्या लाघवी प्रेमाने सदैव धडकी भरते उरी
कितिक खुडल्या कळ्या मी कित्येक अंकूर ठार केले...

तुझी जन्माची वैरीण मी अन् तू ही असा खलनायक
कधीच कळले नाही परंतु कोणी अत्याचार केले...

मी, माझा संसार, पिल्ले, घरटे आता काटेकोर
तुला अज्ञात वाटेवरती मी या घराचे दार केले....
***

हाक

लावणी मादक असते घरच्या गाण्याहून
बरसात पोषक असते भरल्या पाण्याहून...

कणगी भरुन असता उपवास पचून जातो
ती भूक दाहक नसते सरल्या दाण्याहून...

ढेकूळ फुटल्यावर ओढा गढूळ वाहतो
मग सपान नितळ फुलते पळत्या पाण्याहून...

लेक सासुराशी बापाचे संचित नेते
उजळ काहीही नसते असल्या सोन्याहून...

हाक थांबली बिनवाटेच्या गावाकडची
मरण त्याचे परवडले फसव्या जाण्याहून...
***

तुझ्या पदराआड...

तुझ्या पदराआड सुसाट जेव्हा शिरतो
बनते सर्वज्ञ योगी दिवानगी माझी...
 
तुझ्या पदराआड उगाच जेव्हा हरतो
शत्रुस फितुर असते परवानगी माझी...

तुझ्या पदराआड ढसास जेव्हा रडतो
तेव्हा मला गवसते मर्दानगी माझी...

तुझ्या पदराआड असाच जेव्हा लपतो
कुशीत आईच्या मग रवानगी माझी...
***

ढग...

अमुक तमुक विद्यालयाची
१००टक्के निकालाची परंपरा सलग १० व्या वर्षी कायम...
.
दणकट रूबाबदार
संस्थाचालक कम मुख्याध्यापकांच्या
फोटो शेजारची जाडजुड अक्षरं तिने वाचली...
.
पोस्टर मधल्या तिच्या चिमण्या मैत्रिणी
वाटत होत्या परक्या..
.
कालपासुन एकाच विचारानं
तिचा जीव पाणी पाणी व्हायचा....
.
जर आपल्याला गणितात
दोन मार्क कमी पडले असते तर....
.
पुन्हा तिच्या मनात कालवाकालव झाली...
हातातलं गुणपत्रक
पून्हा पाहीलं तिनं नजर भरून..
.
गणित विषयाच्या रकान्यातल्या
३५ मार्कांवर पुन्हा दाटले ढग...

****