माती

नकोस खोदू बाई जुन्या गढीची माती
उगाच बोलंल काही जुन्या गढीची माती
.
भरोशाने या धन गाडून घेते निश्चळ
बधणार अशी नाही जुन्या गढीची माती
.
सुन्या गावठाणात अजुनही ती सळसळते
व्यापून दिशा दाही जुन्या गढीची माती
.
पाया खोदत जाता घबाड कसले आता
श्वास गाडते काही जुन्या गढीची माती
***

कणीक

एखादी स्री गप्पा मारेल..
तुमचं ऐकून घेईल..
प्रसंगी तिखट होईल..
हॉटी नॉटी होईल..
वर तुमच्यावर तिची काहीच जबाबदारी नसेल..
मग तुम्ही तुमचं पुरूषत्व
सहज हाताशी लागेल असं बाजुला ठेऊन
अमर्याद उदारही होऊ शकता...
स्रीवादी होउ शकता...
कारण ती तुम्हाला प्रत्यक्षात भेटणारच नसते..
.
फेसबुक वरून बाजुला झाल्यावर
तुम्ही भाजी पूरेशी तिखट नसल्याबद्दल
बायकोवर डाफरता...
झालंच तर तिच्या गालावरच्या खळीतला
ताजेपणा पाहून
मनात किंचित चिंताही करून घेता..
.
दुसऱ्या बाजुला जी कोणी फेसबुकवरून
बाजुला झालेली आहे..
ती पुढच्या काही रिक्वेस्टांकडे दुर्लक्ष करून
एक लांब सुस्कारा सोडते...
.
आणि मग कित्येक स्रीवादी पुरूषांचा पाचोळा
उडून जातो हवेत..
ती उठून स्वयंपाकाला लागते..
नि मळत बसते आपल्या सनातन प्रश्नांची कणीक..
***

व्यवहार

जिथे तिथे मी ही असे तोट्याचे व्यवहार केले
तुझ्यापासून दूर झाले नि दोनाचे चार केले....

तू दिलेल्या नकाराचा सूड असा घेतला मी
देणेघेणे नसते तिथे प्रेम अपरंपार केले...

प्राक्तनावर चरफडून मी हात दुसऱ्या हाती दिला
त्यानेही कहर केला, प्रेम मजवर फार केले....

तुझ्या लाघवी प्रेमाने सदैव धडकी भरते उरी
कितिक खुडल्या कळ्या मी कित्येक अंकूर ठार केले...

तुझी जन्माची वैरीण मी अन् तू ही असा खलनायक
कधीच कळले नाही परंतु कोणी अत्याचार केले...

मी, माझा संसार, पिल्ले, घरटे आता काटेकोर
तुला अज्ञात वाटेवरती मी या घराचे दार केले....
***

हाक

लावणी मादक असते घरच्या गाण्याहून
बरसात पोषक असते भरल्या पाण्याहून...

कणगी भरुन असता उपवास पचून जातो
ती भूक दाहक नसते सरल्या दाण्याहून...

ढेकूळ फुटल्यावर ओढा गढूळ वाहतो
मग सपान नितळ फुलते पळत्या पाण्याहून...

लेक सासुराशी बापाचे संचित नेते
उजळ काहीही नसते असल्या सोन्याहून...

हाक थांबली बिनवाटेच्या गावाकडची
मरण त्याचे परवडले फसव्या जाण्याहून...
***