पुन्हा पुन्हा अन्...

तुझ्याच गर्भातली
तुटली जुळली रसायने
पुन्हा पुन्हा अन्
अवतरलो मी.
.
कातर गहिवर चिडके रडके
लाडीगोडीचे ताणेबाणे
पुन्हा पुन्हा अन्
बागडलो मी.
.
झालो निब्बर जरठ दगड
वादळलो रगमस्तीने
पुन्हा पुन्हा अन्
विरघळलो मी.
.
झालो किंचित नि अनंत चराचर
पण तुझ्यातल्या मृगजळाने
पुन्हा पुन्हा अन्
गोंधळलो मी.
.
पुन्हा पुन्हा हे सांगून सवरुन
झेपावयाच्या अथक प्रयत्ने
पुन्हा पुन्हा अन्
तुरूंगलो मी....!
***

•